هساره
کووکردنەوەێ : شارام ئەکبەری
هسارە : بازی کوردی به‌شێگه له فه‌رهه‌نگ کورد بێگومان هه‌ر کوومه‌ڵگاێگ له دنیا له به‌ش بازی کردن مناڵه‌یل ئڕا خوه‌ێ قسیه‌یلێگ دێرێد. وڵات کوردستان وه تایبه‌ت ناوچه‌ێ که‌ڵهۆڕ له به‌ش بازی کردن خاون بازیه‌یل فرەێگه وه تۊیه‌نیم بۊشیم ناوچه‌ێگ ده‌وڵه‌مه‌نه له ئه‌ێ بابه‌ته.له نیشتمان کوردستان بازیه‌یلێگ کریه‌ێد زوورم وه سه‌ردی و گه‌رمی ناوچه یا ده‌یشته بۊین یا کۊیه و که‌ش بۊن ئه‌و وڵاته‌گ کورد له ناوێ مه‌زریاس خریه‌ێده‌و ڕێ. بازیه‌یل کوردی له ناو مێژوو و دڵ تاریخ کوردییا تیه‌ێد وه زوورمێیان ئڕا ته‌ندرستی له‌ش و ژیان خه‌ڵک کورده .ئڕا یه‌گ زێاتر ئه‌ێ بازیه‌یل کوردی وڵاتمانه بناسیم گله گله شییان که‌مه‌و.
کڵاو ڕه‌وانه‌کی
ئه‌ێ بازییه هه‌ر ئه‌وجوره ک له ناوێ دیاره باێه‌د کڵاو بڕواکنید. شێوه‌ێ وه ڕێ خسن ئه‌ێ بازییه لێواسه ک یه‌ێ که‌س له یه‌ێ گوڵ زه‌ۊ نیشێد وه کڵاوێگ نه‌ێده‌و تگ سه‌ر وه کڕێگ کیشێده ده‌ور خوه‌ێیا جورێگ ک یه‌ێ خڕ بخوەێده ده‌ورێیا به‌شداره‌یل ئه‌ێ بازییه هه‌رچه‌ن که‌سێگ تۊیه‌نێد بوود به‌ڵام ئه‌گه‌ر فره شلخ نه‌ود خاستربوود به‌ش داری بکه‌ید، به‌شداری که‌ره‌یل که‌متر له هه‌یشت که‌سن. به‌شداری که‌ره‌یل وه ده‌ورێیا خڕ خوه‌ن وه باێه‌د کڵاوێگ ک هاسه‌ر ئه‌وه‌گ نیشتیه بڕواکنن هه‌ر که‌سێگ بڕواکنێده‌ێ پیرووز و سه‌ربه‌رز ئه‌ێ بازییه‌سه. یه‌ی شه بۊشم ک باێه‌د له کڕیگ کیشانه قولێیان ئه‌و ناو نه‌چوود ئه‌ێ بازییه یه‌کێگ له خوه‌شترین بازیه‌یل ناوچه‌ێ که‌ڵهۆڕه ک زێاتر له جیێگ خه‌نه‌ێه‌و ڕێ ک زه‌ۊ نه‌رمێگ بوود.
