“گەڕانەوەی زەمەن و جێگۆڕکێی زەمین” – “پێشەوا کاکەیی”

 

گەر زەمەن بگەڕێتەوە زەوی دەوەستێنم/

بەرلەوەی بکەومە شیکاری مانگ و ئەستێرە/

ڕاڤەی گەردوون دەکەم/

خودا لە شوێنی خۆیدا دەهێڵمەوە/

نیشانەی سەرسوڕمان لادەبەم و پرسیار دادەنێم/

عەتارد و زوهرە وەك خۆی دەهێڵمەوە/

زەوی هەڵدەگرم و دەیشارمەوە/

مرۆڤ هێندە قێزەونی کردووە/

ئایەتی سپی تێدا ڕەش کردووە/

چیدی گاڵتە بە مەریخ ناکەم/

بە قومێ ئاو تاسوقی بشکێنم/

موشتەری بە گەوەرەیی خۆی ناهێڵمەوە و هەندێ ئەستێرەی لە سەرشان لادەبەم/

 کەمێك دایدەتاشم و چڕی ئاوی بۆ زیاد دەکەم/

بە زوحەل دەڵێم: بەسە دووڕوویی و خۆ جوانکردن لەبەر ترێفەی مانگدا/

 کە تیشکی هەتاو ناپڕژێت بەسەرتدا/

ئۆرانۆس هەر لە خۆوەوە بە دەوری خۆیدا دەخولێتەوە/

بێئەوەی تەنیا نێزەکێك ڕاخزێت و بە ئاگای بێنێتەوە/

نیپتۆن بێدەنگ دەوەستێت/

وەك ئەوەی هەر نێوی نەبێت/

ئاخ چی بکەم لە دەنگی پلۆتۆ/

لە نووزەنووزی ئەستێرە/

کە چاوی دەکەوێت بە تۆ/

نا چۆن هیچ ناکرێت/

ناشکرێت بە تووڕەیی بچیتە جێی پلۆتۆ/

ئاخر دانان لە دوای وی/ وا دەردەکەویت کە بچووکتری/

نا بیرمە زەمینم هەڵگرت و شاردمەوە/

زەمین هێندە پیسە… گوناهە بەکاری بێنمەوە/

 نا تۆ هەڵدەگرم و دەتخەمەوە جێی زەوییەوە/

هەم تۆ بە دەوری خۆتدا دەخولێیتەوە بۆ تەواوبوونی مەقسودی دڵ/

هەم مینش بە دەوری تۆدا دەسووڕێمەوە… تا تۆ دەهێنمەوە جێی دڵ