هساره
۱-
ده‌م شه‌وه‌کیان
وه‌ناکاوه گۆله‌ێگ ده‌رچی
داره هه‌نجیره‌گه،
مه‌لۊچکه‌گان جۊر یه‌ۆ گۆمه‌ڵ ڕێخ هه‌ڵڕشانه ناو مه‌جمه‌ێ خۆڵه‌که‌وین ئاسمانگ
خان وو خێڵه‌گه‌ێ،هریکهاکێان بی وو وه‌ره‌و ماڵ چیان
ئیمه دی به‌زه بۊمن
تف وه قڕووژنه‌کمان نه‌چیا خوار
له جاێ په‌ڕانه‌گه‌ێ باپیر، وه شون چه‌مه‌ریه‌گه‌ێ سوو بیم…
۲-
هه‌ر خه‌ێاڵم تێده ده‌ر ماڵد وه‌سه‌ور
جۊ که‌پوو نیشێده‌قه‌ێ باڵد وه‌سه‌ور
ئه‌تر مێخه‌ک سه‌رخوه‌شی ده‌ێده وڵات
وا ئه‌گه‌ر واکه‌ێ له‌چک واڵد وه‌سه‌ور
خوه‌ش وه‌حاڵ ئه‌و باڵ گه‌رمه ڕوژ وه‌فر
تا نه‌له‌رزی خوه‌ێ که‌ێه شاڵد وه‌سه‌ور
له‌ی وڵاته هه‌رکه‌سێ ها هه‌زره‌ته‌ێ
ده‌س بکیشێدن وه‌مل خاڵد وه‌سه‌ور
بیلا بوومه باخه‌وان ئه‌و باخه دی
تا بڕه‌سنم میوه‌گه‌ێ کاڵد وه‌سه‌ور
هه‌ر جواوم که‌یدو هه‌ر هامه ته‌ما
بوودنه قه‌ن هه‌رقسه‌ێ تاڵد وه‌سه‌ور.
۳-
هه‌م چه‌وه‌ڕێ هیشتیه‌سه‌م یاره‌گه‌م!
بار خه‌مێگ نیشتێه‌سه دڵ زاره‌گه‌م
کووشک قه‌دیم چووڵ بێ مه‌ردمم
داڕمێیه مل خوه‌ما لاواره‌گه‌م
بچی چماێ زۆقۆم زۆقۆم ڕچیه‌موو
ته‌م ته‌مه‌لۊلان تێیه شه‌و تاره‌گه‌م
هه‌ناسه‌گه‌م ئه‌گه‌ر تێوو ئه‌گه‌ر چوو
ئه‌ڕا تۆێه ئه‌ڕا تۆ نازاره‌گه‌م
ساز کزێگم، تۆێی زه‌مزه‌مه‌یلم
م ئاسمانگم، تۆێی ئاساره‌گه‌م
وشکه‌مه‌ڵاق-کانیێگم، بووار
دره‌نگ مه‌که هه‌ور خۆڕووم واره‌گه‌م
