هساره
پیره پیاێ ته‌مه‌نێ له شه‌س داسه‌و بان، وه‌ڵام له‌به حه‌ز له پرچ و پاكی كه‌ێ چۊ ئه‌ێ كور جاێڵ جوان ده‌س تیه‌رێیه‌و خوه‌ێیا، پرچ و سێوڵێ ده‌ژێگ دێرێدن ده‌نكێ لێ نه‌ڕزیاس وه‌ڵام باوه‌ڕ نیه‌كه‌م ئهگهر قژێ به‌ێده یه‌كا تاڵێ سییه له تێ بۊنیه‌ێدنه‌و، ئه‌و ده‌س په‌ل نه‌رم چۊ لوكه‌ێه، پووس چه‌رمێگ ڕه‌گه‌ێل رێز و كه‌و له ژێرێه‌و دیاره، نیشان ده‌ێ له ئێ چه‌ن ساڵه‌ێ عومرێیه یهێ جار ئه‌ره‌ق ئه‌و تێولێ نه‌نیشتێیه، ئه‌ولۊت باریك و دهم و چاو گرده باس له جووانیێگ كه‌ێدن ك سه‌رنج فره كه‌س وه‌ره‌و لاێ خوه‌ێ كیشاس، شه‌لوار كتان قاوه‌‌ی و شه‌ۊ میل میل باڵ كوڵێ ها له وه‌رێ، له پاڵ ده‌س كوره‌‌گه‌ێ ك پا ناسه‌و بان گاز ماشینه‌گه‌و خوڕیه‌ێه لێ تا زۊتر بره‌سێیه شار، نیشتیه، ره‌سێیه‌‌و نزیك ئاوائیگ ها ئێ دیم حه‌سه‌ن ئاوا. هناسه‌ێ سه‌ردێگ، گاجار گوشار تیه‌ڕێیه‌و جناخ سینه‌ێ وه ئارام دهێدهو ده‌یشت:
- عومر ئاێه‌می زاێه چۊ وا تیه‌ێ و چوو، دۊیاێ بیس سی ساڵ هێمان ئه‌و ههست تفت و تیه‌‌ڵه له ناو ده‌رۊنم جێ گردێ هه‌گ وه‌‌ی جاده‌‌‌ێا تیه‌م و چم سه‌ر هه‌ڵ ده‌ێد‌و حاڵم خه‌راو كه‌ێ، قه‌ت له هۊرمه‌و نیه‌چوو،
زووراو رۊ كهێهو باوگێ :
- باوگه با لا بگریمه ئێ قاوه‌خانه پیاڵه‌ێ چای بخوه‌یم.
- قه‌ێ چوه‌كه‌ێ ڕووڵه‌م.
زووراوخڕێ دهێهو فه‌رمان ماشینه‌گه تا لا بگرێه ده‌ر قاوه‌خانه‌ێگ له ناو داره‌یل گردكان و مه‌ێو وه زور ئه‌و دی كریه‌ێ، یهێ ده‌س نه‌ێده لنگ درانه‌گه‌‌ده‌س تره‌ك له پشت باوگ، چنه‌‌‌و ناو له بان نیمگه‌ت چوویێگ ك له‌تێ فه‌رش نیم دار ها بانێ دانیشن، پیره‌پیا له ێه‌گ هاتێ شه‌ق شه‌ڵواره‌گه‌ێ خه‌راو بوو ناراحه‌ته، وه نه‌وه دڵ دانیشێ. قاوه‌‌چی د پیاڵه چاێ خوه‌ش ره‌نگ نه‌ێده‌و وه‌ر ده‌‌سێیان، پیره‌پیاێ تره‌ك هاو ته‌مه‌ن عه‌لی له پشت ده‌خڵه‌گه ك فه‌رشه بۊچكه‌ڵه‌ێ خریاسه بانێ نیشتێیه‌و نووڕێه پێیانه‌و. ده‌فته‌رێ ها له‌وه‌ر ده‌سێ، تلیفون سییه‌ێگ ها له گوشه‌ێ تره‌ك مێزه‌گه
- ده‌س خوه‌ش كاكه
- نوش گیان
- باوگه نه‌وه‌تی كام ههست تفت تیه‌ل ؟
عه‌لی چه‌ویلكه‌‌ێگ ها له بان چه‌وێ لاوه‌ێ، وه د كلك كه‌مێ وڵاێدان، ههست كه‌ێد ئرمێس زایه‌سه تێیان، وه‌ڵام نه، قوڵه‌ێ ده‌رۊن دی چۊ جاران هێزه تێ نه‌مه‌نێیه ئه‌و بان باێد و له چه‌وه‌یلی بڕشیێه‌ێ، ئهگهر دۊنێ ئاو زاێده‌تێ له بێ نزی چه‌وه، نه ههست ده‌رۊن.
- راسی تا ئێرهنگه ئڕاد وه‌تمه چۊ ناود نامه زووراو؟
- نه وه‌ڵا باوگه، باس نه‌كردیه.
- · بیس، سی ساڵ له یه‌‌وه‌ر هه‌گ من و خودا بیامرز داڵگد ره‌سیمنه ئێره كاره‌ساتێگ قۆمیاۊد قه‌ت له هۊرمه‌و نیه‌چوو، ئه‌و به‌ێنه قاوه‌خانه نه‌ۊ، ئه‌و رووژه پیاوه‌تیگ له یه‌كێ دیم، ئاێه‌م له كهم كه‌سێگ دۊنێ، پیاێ خاس و لاێه‌قی، پیاێ هه‌ساوی، نه‌گ چۊ كوڕه‌یل ئمڕوو قرتی و لات پات، دۊیاخر پرسیمه لێ ناود چوه‌س، وه‌ت زووراو، چۊنه له پیاوه‌تی ئه‌ۊ خوه‌شم هات هساو نه‌ێاشت، ئه‌رێ كوڕم تازه ره‌سۊمنه نزیك ئێ ئاواێی كووره‌و بۊیه، جه‌ماعه‌ت فره‌ێگ كووه‌و بۊید، ماشینه‌‌یل فه‌ره‌ێگ قووڵ ناۊنه‌و بان قووڵ.
پیره پیاێگ ك ها پشت ده‌خڵه‌گه رۊ كه‌ێده‌و عه‌لی و سهرێ له‌‌‌قنێ:
- ریك سی ساڵه، سی ساڵ ته‌مام
- · ت له كوو زانی؟!
- · كۊیه له كۊیه نیه‌ته‌تێ ئاێه‌م له ئاێه‌م ته‌‌تێ.
عه‌لی دۊێاێ یه‌گ خاس ئیسفاێ پیره‌پیا گرێ:
- زووراو ئه‌وه تنید؟
باوش كوتن له یهك و تێر ماچ دهم چه‌و یهك كه‌ن
- به‌لێ عه‌لی گیان خاسی؟ خوه‌شی؟ چه‌ومان روشن.
- ت له كوو ئێره له كوو؟ له ئێره چوه كه‌ێ؟
- دۊیاێ ئه‌و پێشامه‌ده وه‌ل خوه‌مه‌و شه‌رد كردم له ئێره نیشته جێ بووم تا ئهگهر له ده‌سم هات بتۊیه‌نم جارێ تره‌ك ئێ مه‌ردمه بارمه سه‌ر رێ راس و درس، كارێ بكه‌م پشت ئه‌و هه‌م نه‌وع خوه‌ێان نه‌كه‌ن، یارمه‌تی یه‌كان بێیه‌ن،
- زووراو گیان هه وه گیان خوه‌د هه ئێرهنگه توواسم باسد ئڕاێ زووراو كوڕم بكه‌م، ها ت بنووڕه ئێ دنیاوه، راس ئه‌و وه‌خته‌ێ تووام باسد بكه‌م جارێ تره‌ك ته‌قیایمنه یه‌كه‌و! چۊنی كاكه؟ هاتێ باوه‌ڕ نه‌كه‌ی له ههر كوو چووار پیاێ خاس نیشنه یه‌كه‌و، باس له پیاوه‌تی كه‌ن، من باس له ت كهم، داێه‌م های له هۊرم، زانی چه‌ن ساڵه نه‌یمه‌سه‌د؟
عه‌لی جارێ تر رۊ كه‌ێده زووراو:
- زووراوگیان ئێ پیا ههر ئه‌و ئاێه‌مه‌سه توواسم باسێ ئڕاد بكه‌م.
زووراو كوڕ عه‌لی هه‌ڵسێیه‌و پا ده‌س كه‌یه‌و مل زووراو:
- چۊنی خاڵو؟ خاسی؟خوه‌شی ئه‌لحمدلا؟
- وه خوه‌شی ئێوه گیانه‌گه‌م .
عه‌لی رۊ كه‌ێده‌و زووراو:
- ها له ئێره‌ۊیه دیمه‌د، ها؟
- به‌ڵی
- وه خودا چمان هه دۊیه‌كه بۊ، لهو نامه‌یه‌‌پا له ماشینه‌گه ناوردیمه‌و، له لید پرسیمن :
- ته‌سادف بۊیه؟
- ها، به‌ڵێ، خاوه‌رێگ كه‌فتیه‌سه‌و خوار.
- كه‌سێ له به‌ێن چییه؟
- ئه‌رێ، شوفره‌‌گه‌ێ، برا گیان خوداوه‌ند ئه‌و مل شه‌ڕا نه‌وه‌ێده‌‌د سوواو دێرێ، ئهگهر ره‌سیدنه پلیس راه خه‌وه‌ر بێیه، بۊش سی كیلومترێگ منێیه بره‌سی شار خاوه‌رێگ له جاده چیه‌سه‌و خوار، بانه‌و دیارێ.
- بان چه‌و.
عه‌لی رۊ كه‌ێده‌و زووراو:
- نه‌وه‌تی له‌‌ئێره چوه كهی؟ ئێ قاوه‌خانه هن كیه؟
- ها هۊرد ئه‌و سه‌رده‌مه؟ مه‌ردم ئێ ئابادیه چۊ ژیان؟ كه‌س نه‌زانس ئڕا لێوا ژیه‌ن، چۊ خێ گردۊنه ئه‌و ژیانه، ها هۊرد بێجگه ئه‌و كه‌سانێگه له ماشینه‌گان پا هاوردیانه‌و تا بزانن چوه بۊیه، كه‌س مه‌‌ێه‌ت لێ قومیاێگ نێیاد، گشت له هۊر یه بۊن چۊ چه‌ن ده‌ڵق فیشتر خێار بووهن ئڕاێ ماڵ، عه‌لی گیان ت نه‌یدن چۊ چه‌ویل بێ نز شوفر خاوه‌ره‌گه ك خودا خه‌ڕێ دنیا گردۊده‌و سهرێ نووڕیاده مهردمهگهوه! زووان له ناو ده‌مێ گل نیه‌‌خواردیاد تا دۊیا هه‌‌ناسه‌ێگ وه زور له قوڕێ د‌راێ بكه‌ێده كلیمه‌ێگ بره‌سێیه گووش ئێ دۊاێ مه‌ردمه‌‌گه،كه‌س نیه‌وێرێست ده‌س به‌ێده قه‌ێه‌و، گشت رخێیان چی بووده شه‌ڕێگ و ڕیشێیان بگرێ، خاس ها هۊرم هۊرده هۊرده كڕكڕه‌ێ چه‌وه‌یل ئه‌و بێچاره هاته‌و خوار، ت له دۊره‌‌و چریده‌م، خۊنێگ كه‌فتۊدنه ڕێ و له مه‌ی باریكه‌جووێگ گه‌ردیاد تا له ناو ئه‌و خه‌ڵكه خوه‌ێ خه‌ڵاس بكه‌ێ، گره‌سێا، مه‌ێه‌سه‌یلێگ لهو نزیكه سه‌ر كردۊنه ناو سڕكوڵانێگه‌و بو خۊن تازه شنه‌فتن كه‌فتۊنه رێ تا ده‌س و پاێ خوهێیان بنه‌ن له تێ،
- خاس ها هۊرم، تنیش وهو مۊیه‌ێل ماش برنج پڕه‌و ك نوواگه‌ێ داۊدنه‌و بان و شه‌واڵ كوردی و كوتر سییه‌ێگ كردۊده وه‌ر لیم نزیكه‌و بۊد، جفتێ گیوه‌ێ كار هه‌ورامان هه چۊ ئێرهنگه له پادۊ، ته‌سپیه گله‌قه‌ۊیش وه ده‌سه‌و،
نوڕێیه گه‌ر مچیێه‌و.
- دۊنم هێمان دیرێده‌ێ، دوو سێ دانه كلوانگ نقره گه‌ورا له ك‌لكد بۊ، هناێ دیدن كه‌س خوه‌ێ له تخون ئه‌و به‌‌دبه‌خته نیه‌‌ێ دهنگ به‌رزه‌و كردی:
زووراو چوده ناو خه‌ێاڵه‌و:
- خودا راسدان چۊ تیه‌رێ؟ یه‌كێ ماڵێ ئاگر گرێ، یه‌كێ مه‌لۊچك وه پێ برشنێ.
گووش نایده قه‌ێ دهم شوفره‌گه‌و، نووڕێه مهردمهگهوه.
- نه، هه‌ناس نیه‌كیشێ!
- ئه‌زیزم با بچیمه ڕێیه‌و، نیه‌تۊیه‌نم ئێ چشته‌ێله بۊنم، دڵم بڕۊیه نیهكهێ ،
- چه‌شم عه‌زیزم .
فههیمه ده‌مێگ قوته‌و كه‌ێ:
- قوربوون تو شوهر ئه‌زیز.
زووراو چوو ده‌ر ماشینه‌گه كه‌ێده‌و :
- پهتووێگ له بان سه‌نده‌لی ماشینه‌گه بۊ هارودم، دۊێاێ ئه‌وه‌ێگه مه‌ێه‌‌‌سه‌گان تاڕانم دامه‌ێ ملێیا. هه‌شیمه‌تێگ له ئه‌وره گرده‌و بۊن چۊ چشتێگ چه‌وه‌ڕێ بۊن تا یه‌كێ له‌وانه‌ێگه پا تیه‌رێده‌و پیاوه‌تێ بكه‌ێ پهتووێگ تا یهێ سات وه‌رجله ئێرهنگه له ژێر بۊیه به‌‌ێده‌و مڵێیا، ده‌سه‌یلێیان وه وه ده‌سه‌یل ڕێ گیرفان گرته‌و وه‌ر، تاگه‌ر زۊتر ئه‌ر‌ك شه‌رعی خوه‌ێان ئه‌و جی بارن، هاتێ باوه‌ڕ نه‌كه‌ین ئه‌وانه‌ێگه كه‌مێ له‌وه‌وه‌ر ده‌ڵق خێیار دیانه رۊ سینه‌و بردیان ئڕاێ ماڵ، بن گیرفان گه‌ردیان تا سكه‌ێگ بۊننه‌و بخه‌نه‌و بان ته‌رمه‌گه، خه‌ڵك باوه‌ڕ دێرن ئێ كاره كه‌مێ له بار گوناێان سووكه‌و كه‌ێ، ئڕاێ یه‌گ له باوه‌ت هاتن پلیسه‌و خاترم جه‌م بوو نوواێ چه‌ن ماشین تره‌ك گردم، دڵنیا بۊم یه‌كێ خه‌وه‌ر دهێهو پاسگاه، هه‌گ هاتمه‌‌و بان جنازه‌‌گه چه‌وم كه‌فت له مناڵ سی چل ساڵانێك خێارێگ ها ده‌سێه‌و چه‌ن جارێگ ساێده قه‌ێ شه‌واڵه‌گه‌ێیا، هاتێ وه خۊنه‌و بۊد كه‌سێ چوزانێ قه‌پ دیاده لێ :
- چوه كهی روڵه؟
- م روڵه نیم، جه‌مشێرم، ت ئۊشێ خوا نه‌ێرێدن؟
هه‌گ نووڕێیه دیمهن ناشیرن و پرت پێسێیه‌و له حاڵ رووژێ ره‌سێه‌و بسكه‌ێ كه‌ێ،
- با بگردیم بزانیم دێرێ
زووراو ده‌ر داشپورته‌‌گه دهێدهو چه‌وێ چوه مل كیف به‌‌خه‌لێگا، ده‌ێده‌ێه یه‌كا تا بزانێ كیه، ژماره تلیفون ها له تێ یا نه، جه‌مشێر بێده‌‌نگ ده‌س كه‌ێده‌و گرده‌و كردن پۊلێگ كه‌س دڵی بڕۊیه نیهكهێ گردیانه‌و بكه‌ێ، جار جار نوورێه‌‌مه‌ردمه‌‌و تا بزانێ كه‌س ئه‌و جوواو تیه‌ێ یا نه، ئه‌گوه‌ر وه ژێر چه‌وه‌و ئیشاره دێده‌‌پێ:
- زۊ كه، ده‌ی
- ئه‌وه چوه كهی خودا ئڕاد نه‌سازێ، ئه‌و پۊله ئڕا گرده‌و كهی ؟
- چوزانم ئه‌كی وه‌ت گردێانه‌و كه، وه‌ت ئه‌ر یهێ تمه‌ن لێ بنه‌یده گیرفان كوشمه‌د.
- دروو ده‌ێ ئێ شێت نگبه‌ته.
- · م درو كهم باوگ سه‌ێ! ت خوه‌د نه‌وه‌تی گیرفاند گه‌ردم، نه‌وه‌تی هۊرده ئڕاێ ناو تاكسیه‌گه نه‌ێرم. نه‌وه‌تی باران ئڕام
- ئه‌رێ خودا بكه‌ێ هه لێوا چه‌ودان وه ده‌س مه‌ردمه‌و بوو، خوانچه قه‌ۊیه‌ل له ورسی مردێ، خاسه ژماره تلفونێگ هاتێ، هه‌گ ره‌سیمنه پاسگاه زه‌نگ ده‌یمنه ماڵێیان، بێچاره بیمه‌گه‌ێ ته‌مام بۊیه
كوڕه جاێڵ جوان وه ته‌زه‌كه‌و :
- مه‌گه‌ر بیمه ئه‌بوڵفه‌زل یا دعاێ مادر ته‌مام بو؟
جه‌مشێر ك له ته‌زه‌ك كوڕه نیه‌‌ره‌سێده‌و:
- به‌ڵێ ته‌مام بوو، هه چۊ ئومر ئێ ئاێه‌مه ته‌مام بوود دی، ئه‌وقه‌ره كه‌س گووشه پێ نه‌ێاد تا ته‌مام بۊ، هاتێ مناڵه‌گه‌ێ له ماڵ چه‌وه‌رێ بوو،
زووراو نووڕێه ئه‌و ماشینه‌و ك دۊیاێ چه‌ن پل چووار چه‌قه‌ڵێ بۊیه‌‌‌سه‌و بان، چه‌وێ چوه مل نۊسریاێگ ها له پشت د لاێ ده‌ر دۊیاێه‌و، خوه‌نێده‌ێ: بیمه‌ێ ئه‌بوڵفه‌زل، بیمه دعای مادر، رۊ كه‌ێده‌و ئه‌و كوڕه ك ته‌زه‌ك كرد:
- چۊ ئه‌و جی نه‌هاتن؟
ماشینێگ چراخ قرمزێ وه بانێه‌و گل خوه‌د له دۊرا نزیكه‌و بۊ، زووراو چوده پیریێانه‌و
- ئه‌وسه هات!
عه‌لی سه‌ر باسه‌گه گرێه‌و ده‌س :
- ئه‌و روو هه‌گ له ئێره چیمنه رێیه‌و، ره‌سیمنه ده‌ر پلیس راه رۊ كردمه داڵگ زووراو:
- فههیمه ت ئۊشێ ئه‌و بێچاره كی بۊ له به‌ێن چۊد؟ فره دڵم ئڕاێ سزێ، یهسه ره‌سیمنه پاسگاه با پا بارمه‌و خه‌وه‌ر به‌مه پێیان سوواوه.
- وڵ كه كوره بچیم، باوگم تا ئێرهنگه باێه‌د هاتۊدنه‌و له زۊیه‌و نه‌یمه‌سه‌ێ، ئه‌ر بزانی چه‌نێ دڵم ئڕاێ ته‌نگ بۊیه! هاتێ باوه‌ر نه‌كه‌ێ. ئه‌ۊ وه تهنیا وه یهێ لا ئێ دۊێاێ كه‌س و كارم وه یهێ لا.
- یارو وه‌ت خه‌وه‌رێیان بكه‌یم. با خه‌وه‌ر بێیه‌م.
- وڵ بكه با بچیم، م نیه‌زانم ت له كهێهو كه‌فتیدنه‌سه فكر خه‌ێر و خه‌ێرات، له كهێهو هایدنه فكر سوواو كردن ، بكه ڕێ ههر كه‌س ت په‌ره‌سی ماته‌ڵمان مه‌كه،
- خه‌ێر نه خانم، ئێنسانیه‌ت، نه‌وع دو‌ستی، ههر چێگ ت ئۊشی.
- وڵ كه ئێ قسیهیله، ئیمه هایم له رووزگارێگ ئێ قسیهیله یهێ پۊل سیه نیه‌تیه‌رزێ. نه‌یدن گشت له هه‌وڵ و هه‌ڵاێ یه بۊن چه‌ن كارتون فیشتر خێیار بووهن ئڕاێ ماڵ. تهنیا كه‌سێگ دڵ سزانیاد ئه‌و یارو مریخی و شێته‌گه بۊ.
- مریخی كا‌مه؟
- یارو ته‌سپیه وه ده‌س كلوانك له كلك.
- یانێ به‌زه‌ئی له رۊ زه‌ۊ باركردێیه چیه‌سه مریخ؟ دنیا چۊنه خه‌راو بۊیه كه‌س له كه‌س لا نیه‌كه‌ێه‌و؟ كه‌س به‌زه‌ئی وه كه‌سا نیه‌تیه‌ێ؟ ها بكه ڕێ خودا كه‌مێ هۊره‌و بكه، خودا نه‌كه‌ێ، له ده‌مم وا بوه‌ێده‌ێ، ئهگهر یهێ رووژێ ڵێوا كه‌له‌مه‌ێ ریش ئیمه گرت چوه بكه‌یم؟
- مار به‌ێده زووانده‌و خودا به‌كه‌ێ،
- چوه ئۊشی؟ ئهگهر وه یهێ مار ئه‌و ئاێه‌مه‌و دان له كه‌له‌مه‌ێگ كه‌فیمنه‌و لا، با به‌ێده پێمه‌و.
- چوزانم با ده‌س له ئێ قسیهیله ئه‌ڵگریم، كه‌مێ باس دڵ و دڵداری بكه‌یم، باس له رووژه‌یل خوه‌شێگ بكه‌یم بریاره وه یه‌كه‌و داشتۊمن ، بۊش بزانم ت چه‌نێ م دوس دیری؟
- ئه‌وقه‌ره ت باوگد دوس دیری؟
- درو كهی
عه‌لی وه شه‌رمێگه‌و :
- ئه‌رێ زووراو گیان له ناو ئاینه‌‌‌ێ ماشینه‌گه‌و نووڕسمه پشت سه‌ره‌و كامڵه پیاێگ ك مناڵ بۊچكه‌ڵه‌ێ قژ لۊڵ چه‌وكه‌و له پاڵ ده‌سێ دانیشتۊد، دۊیاێ ئه‌وه‌ێگ من و فه‌یمه له ده‌ر پاسگاه ره‌ێ بۊمن له په‌ێكانه چه‌ر‌مێگه‌ێ پا هاورده‌و، نووڕسه چه‌پ و راس خوه‌ێیا، تاگه‌ر بزانێ ماشێنێگ تیر نه‌كردێه، چۊ چشتێ لهو دیمه‌نه گ دۊدن فه‌ره ترسیاۊد، هه‌گ دڵنیا بوو جاده خه‌ڵوه‌ته كه‌فێه‌و رێ دۊیاێ یه‌گ چه‌ن جارێگ لا كردهو تا بزانێد مناڵه‌گه پا ناوردێه‌سه‌و، سه‌ر ناده قه‌ێ ده‌روه‌چ پاسگا‌گه،
نوڕێیه ههر د زوراوه‌و :
- من و فه‌یمه ره‌سیمنه شار، كۊچه و كوڵانه‌گان یه‌كه یه‌كه هیشتیمه‌جی، هه‌رچێ له ماڵ خه‌سۊره نزیكه‌و بۊیایم خه‌مێگ له دیێن دیمهن بان دڵمان گردۊد پڕ ره‌نگتره بۊیاد، ره‌سیمنه ده‌ر ماڵ ئه‌باس خه‌‌سۊره‌م ، فههیمه كلك ناده بان زه‌نگ درانه‌گه، دهنگ نه‌رم نیان فرسهت چۊ گوڵبانگ سه‌حه‌ری یا عه‌تر گوڵباخیێگ تازه وه دهم سروه‌ێ وه‌هاریه‌و واز بۊیه ره‌سیه گووشمان، خه‌مێگ تا ساتێ وه‌رجله ئه‌وسا له سۊك دڵمان جی خوه‌ێ كردۊده‌‌و ئڕاێ چه‌ن چركه‌ێ ڕه‌و‌یا‌ده‌و،
- كیه؟
- منم داڵگه ده‌ره‌گه بكه‌ره‌و.
- ئه‌ێ وه بان چه‌وم روڵه‌گه‌م، خوه‌ش هاتینه، كریاده‌و؟
- به‌لێ
فرسهت وهو شه‌ۊ مه‌خمه‌ڵ گوڵداره‌و سه‌روێنگ دۊ په‌لنگێ بان زه‌ۊ ماڵێ، د هوون گیس شانێ كریاێ له بان سینه‌ێ شووڕه‌و بۊیه، دیمهن ڕه‌سه‌نێگ داسه‌و پێ تیه‌ێده پیریانه‌و، دۊیاێ یه‌گ بان سه‌ر و ده‌س زاواگه‌ێ ماچ كه‌ێ، وه ههر د ده‌س باوش كوتاد له فههیمه:
- خاس كردینه روڵه، هاتینه ، باوه‌ڕ كه‌ن مردم له ته‌نیائی.
- باوگم ها كوو
- دۊیه‌شه‌و زه‌نگ دا، وه‌ت ئمڕوو سات هه‌یشت نوو هامه ماڵ، باێه‌د تا ئێرهنگه ره‌سیۊدن، نیه‌زانم چۊ نه‌ڕه‌سیه، نگران بووم
- جارێ تره‌ك خه‌مێگ كه‌مێ وه‌رجله ئه‌وسا له سۊك دڵ فههیمه خوه‌ێ شاردۊده‌و جارێ تره‌ك ساێه خسته‌و بان دهم و چه‌وێ، خه‌ێاڵات فه‌ره‌ێ هه چۊ په‌له هه‌‌ورێ سییه‌ێ بان ئاسمان زه‌ێنێ داگرت،
- داڵگه هۊچ نیه نگران نه‌و، خودا له ئیمه به‌ێبه‌خت و بێچاره‌یل چوه تواێ، تیه‌ێده‌و، سوسه‌ن خوه‌یشكم ها كوو
- ئه‌ول ده‌زۊرانه‌گه‌ێیا چیه‌سه بازار، وه‌ت خێیار بار دامه.
- كی؟
- باوگد
فه‌یمه چۊ خانێگ زڵزڵه ته‌كانێ به‌ێ ئاوار بوو چه‌ن ته‌كان خوه‌ێ و ده‌ێ له زه‌ۊ،
- فه‌یمه چوه‌ده؟ نامه‌ی گردێه‌‌سه‌د؟ ئڕا لێوا كهی؟ هاتێ ئه‌ۊ نه‌و.
زڕه له تلیفونه‌گه راسه‌و بوو، فرسهت هه‌ڵامات گووشیهگه به‌ێ.
- به‌لێ بفه‌رما
- مه‌نزڵ خاڵو عه‌باسه، عه‌باس ئه‌میری
- به‌ڵی بفه‌رما.
- ئه‌رێ جناب سه‌روان بۊشم بانه كوو.
- بیمارستان دویس ته‌خت خاوی،
- ئه‌ڵوو، ئه‌لوو
- بوه‌خش داڵگم خالو عه‌باس ده پانزه كیلومتر مه‌نێیه‌سه شار ته‌سادف كردێیه، ناڕاحه‌‌‌ت نه‌ون چشتێ نییه كه‌مێ زه‌خمی بۊیه هاڵێ خاسه، یهسه تیه‌رنه‌ێه بیمارسان دویس ته‌خت خاوی زامه‌ت بكیشن بانه‌و دیارێ
عه‌لی گووشیهگه له فرسهت سێنێ
- وه‌تی كه‌ێ ته‌سادف كردێیه؟
- یهك د سات وه‌رجله ئێرهنگه
عه‌لی زۊ چیه‌و سه‌ر دهنگ گڕ وه قه‌وڵ فههیمه پیا مریخێه‌گه.
- ئۊیه هاین له كوو؟
- دویس ته‌ختخوای
- ئه‌و ته‌سادفه‌گ له لێژیه‌‌‌گه‌ێ حه‌سه‌ن ئاوا بۊید ؟
- به‌لێ.
- كه‌ێ بۊیه ؟
- یهك د سات وه‌رجله ئێرهنگه
- ده‌ی چۊ دێر كه‌فتنه‌‌سه‌و رێ ؟
- كاكه لهو وه‌خته تا ئێرهنگه چه‌وه‌رێ پاسگایمن،
ها هۊرد؟ دۊێاێ ئه‌وه‌ێگ هاتیمه نه‌خوه‌شخانه، هاتیدنه پیریمانه‌و رۊ كردهو پیم:
- خودا سه‌بر به‌ێده پیدان،
- ئه‌رێ كوڕم لهو روژهو ئه‌ول خوه‌ما شه‌رت كردمه تا گه‌ر هامه ئێ دنیا ههر ده‌رمه‌نه‌ێ بۊنم مه‌ێه‌تی بێیه‌م، راحه‌ت وه‌‌لاێا ره‌ێ نه‌وم، ئهگهر بۊمه خاوه‌ن كوڕێگ ناوێ بنه‌‌م زوراو، چۊنه مختێ بێیه‌م بووده زوراوێ تره‌ك.
زووراو گه‌وره تیه‌ێده‌و جوواو
- عه‌لی گیان هاتێ باوه‌ڕ نه‌كه‌ی منیش لهو روژهو شه‌رت كردمه له ئێ ئابادیه نیشته جی بووم، وه‌لێیانه‌و بژیه‌م، تا ئهگهر له ده‌سم هات بارمانه سه‌ر ڕێ راس و درس،كارێگ بكه‌م وه‌رجله یه‌ێگ له فكر خوهێیان بوون هۊر كه‌سان تره‌ك بكه‌نه‌و.
- به‌ڵێ وه‌لا ئیوه هه‌ردگدان تا ئێرهنگه ئه‌و شه‌رته ئه‌و جی هاوردینه، وه‌ڵام نیه‌زانم م ئه‌و خاكه‌ڕاێ كاكه زوراوه دێرم یا نه؟…….
