ماڵپەڕی هسارە / ئەدەبیات / وەرگیڕان / وەرگیڕان چیرۆک / نامه‌‌ێ دڵداری – وەرگێڕانێگ لە مەریەم ئەمینی ( سۆما )

نامه‌‌ێ دڵداری – وەرگێڕانێگ لە مەریەم ئەمینی ( سۆما )

ماریو بندتی

نـۊسه‌ر هاوچه‌رخ ئوروگویی ک له‌ ساڵ ۱۹۲۰ هاته‌ دنیا. وه‌ بوونه‌‌‌ێ چیرووک و رۆمان و گاجاریش وه‌ شێعر ناسیاێه‌. زوورم ناوێ وه‌ بوونه‌‌‌‌ێ چیرووکه‌یلێگه‌ ک جوور نامه‌ نۊسیاس. ک له‌ ناو نامه‌گانێ نه‌ وه‌رده‌نگ دیارییه‌ و نه‌ نامه‌نۊس ک  ئڵاجه‌ۊ  بۊن نامه‌گان نیشان ده‌‌ێد.له‌‌ێره‌«نامه‌ێ دڵداری» هه‌ڵوژانمه‌.

………………………….

تا ئمڕوو ک پوستچی هاته‌ ده‌ر ماڵ، نامه‌گه‌د وه‌ ده‌سم نه‌ڕه‌سۊد. وه‌ گومانم تا چووارشه‌مه‌ له‌ ناو نامه‌گان مه‌نۊده‌‌‌ێ،

نامه‌‌‌ڕه‌سنه‌گه‌ وه‌ت: ئاخر پێره‌شه‌و ک نۊسایده‌سه‌‌ێ و کلێ کردیده‌؛ له‌ هۊرد چێیه‌ خاس ناونیشانم له‌ بانێ بنۊسید.

وه‌ سه‌ر یه‌وه‌ گ دۊیه‌‌که‌ کلێ کردیده‌ تا ئێرنگه‌‌ وه‌ ده‌سم نه‌ڕه‌سییه‌. پیاگه‌ ئه‌وه‌ڵ جار هه‌ر منه‌‌ی ناو خانم ئامادورا کرد، نه‌ ناو م. وەڵام ئێرنگه‌ دی نامه‌گه‌د ها ناو ده‌سم… یه‌‌ێ جار له‌ هه‌فته‌… هه‌ر توانم یه‌‌ێ که‌شه‌ له‌ ناو هه‌فته‌ بۊنمه‌د. هه‌م خاسه‌ قه‌‌ێ نیه‌که‌‌‌ێد. وه‌ خاتر کار و بارد زانم ت له‌‌ێوا خوه‌شد تێد،هه‌ر یه‌‌ێ رووژ له‌ هه‌فته‌‌… وەڵام تن خودا بۊشه‌‌ پێم کام رووژه‌ تا ئێ یه‌‌ێ رووژ‌ پڕ له‌ هه‌ستمه‌ له‌ ناو ئه‌و هه‌فت رووژ بێ‌ مدوومه‌‌ هه‌ڵوژنم. ئه‌گه‌ر نه‌ۊشی کام رووژه‌، نیه‌زانی چۊ سه‌ر له‌ لێم شێوێد تا گله‌ گله‌ رووژه‌گان بوه‌مه‌و‌ سه‌ر و چه‌وه‌ڕێد بمینم. چه‌وه‌‌ڕێ رووژ تره‌ک و خوه‌رهه‌ڵاتن تره‌ک، تا شه‌وه‌کی کلگ بێه‌مه‌ چه‌وا و شه‌وار له‌ کیس چێیم، وه‌ همێ ئه‌و رووژه‌ بشمارم.

بۊشه‌ پێم کام رووژه‌ تا له‌ یه‌ فره‌تر خوه‌م نه‌ژه‌نگنم. ئێ بێ‌تاوشتیه‌ وه‌ به‌شم مه‌که‌ و بۊش تا کام رووژ چه‌وه‌ڕێ هیلیده‌م؟ رووژ جمه‌ خاسه‌؟ تا نهار وه‌ل یه‌کا بخوه‌یم/ ئه‌گه‌ر نیه‌ود، شه‌مه‌‌ چه‌؟ خوه‌د بۊش کام رووژ؟ ئه‌ر ئمڕووه‌، ئه‌ر سووه‌ خه‌وه‌رم بکه‌ تا جارتر نه‌که‌یده‌مه‌ تـۊش ئێ شه‌وار چووڵه‌‌ تا ‌وێنه‌ێ باێه‌قوش چه‌وه‌ڕێد‌ بمینم.

هه‌‌گ تیه‌ید خوه‌د زانی چۊ ده‌س و دڵم له‌رزێد و ‌ڕپه‌ێ دڵم‌ له‌ پڕێ به‌ێده‌م و دی نیه‌تۊیه‌نم خانم بووم و وه‌ نه‌رم وه‌لده‌و قسیه‌ بکه‌م، لیم نه‌گری، خوه‌د زانی هه‌گ ده‌نگد چووده‌‌‌ گووشما، گیانم شیه‌و بوود و ئاگام وه‌ خوه‌م نیه‌مینێد ئه‌ونه‌ بێ‌په‌لامار بووم، له‌ وێنه‌ێ یه‌ێ مناڵ کوورپه‌ ک ده‌نگ داڵگێ ئه‌ژنه‌وێد… ت کیید و له‌ کوو هاتیده‌ ک بۊده‌سه‌ به‌ش‌ خوه‌شی و نه‌خوه‌شی م ک سه‌ر و تاێ ژیان م داگرتیده‌؟ له‌ چه‌و م ت که‌مێ ئه‌و‌لاتر له‌ یه‌ێ پیاگید، په‌ریید ک له‌ێوا کردیده‌سه‌مه‌ تۊش خو‌ه‌دو؟ تۆ هه‌ڤاڵ منید یا برامید یا ته‌نیا دڵخوه‌شی؟ تۆ ره‌نگینترین پیته‌یل ناوێگید ک تۊیه‌نی یه‌‌ێ رووژ دڵنیام بکه‌ید یا په‌ژاره‌ و زۊخ بکه‌یده‌ به‌شم. گشتێ ها ده‌س خوه‌د و م گلیه‌‌ی نیه‌‌که‌م.

ئێسه‌ دی سه‌رم ژان که‌ێد و هه‌ست که‌م ته‌وم گرێ!! زانم یه‌ێ رووژ تیه‌‌ید. ئێکه‌ش نیه‌زانم کام رووژ. ئێ گه‌په‌یله‌ ک ئڕاد وه‌تم، ئه‌ر له‌ ناو دڵم بیشتامان، ده‌ق کردم. لیم نه‌گری!!!

 

چاوێک بخشێنە بۆ ....

وێنە هەواڵ ڕێوڕەسم لە خاک نان ماموستاێ نەمر تاهر یاروەیسی

ئمڕوو چوارشەمە ڕێکەفت ۲۶ تیر مانگ ساڵ ۹۸ هەتاوی تەرم ماموستاێ نەمر تاهر یاروەیسی لە …

بۆچوون بنووسە

ئیمەیلەکەتان نیشان نادرێت.خانە داواکراوەکان نیشانە کراون. * بخش‌های موردنیاز علامت‌گذاری شده‌اند *