هساره
جوور پێاێ ک تاوێ چێەمەلێ ڤە زوور شەکەتی، نەگستێ ئەێ ناچاریە مەنۊقنێ و هالیمیش گەرم نەۊیە، چێەم ک ڤازە مەکەێ هەستیێ گشت چۊ دۊ مەنقەڵ سێێ وژە مەێ دەس ڤارا و هەر رووژ ئێڤارەیش مەچووە بەرزترین نوختە سەێرێ و ئەژ تێە دڵ و گیونێ هاوارە مەکەێێە خودا و مووشێ ئەڕا؟؟؟
ڤارونە مەواریا و ئاویونی خێاوانە چۊ شەۆ نەۆرووزە مەلۊلانێ!
کوڕە ڤە تاتی تاتی دەسەل باوە و برا کەڵنگەێ گرتۊتێ ڤە ئی دەس خێاوانە مەدەۆیا.
زۊ سوار ماشینە بین، وژونە دوما جاگیرون کرد و ماشینە کەتەۆ رێ، بڵەم مارەییە کیسەڵێ ک ئەژ بێ دەرایی دونیا وژ کیشاویتێە گوم داێن ئەر نوم خێاوان.
هالیم چەن دەێقەێ نەچۊ دەنگ هاتێێەێر و هەرە ئە دەنگ کپیاێە ڤتێ: باوە! ئاواتێکە دڵت بکە، نووشینە بێنم چێە هو!
باوەێ ڤتێ: چە؟
کوڕە دوگلە قسەێ قورستر ئەژ ئەگل ڤتێ.
باوەێ ڤە خەنە ڤتێ: باشەد، ئاواتم کرد.
کوڕە ڤتێ: ئێسە چێەم راست یا چەپت؟
باوەێ کەمێ وسیا ڤتێ: راس.
کوڕ ڤە دەنگ بەرز بزگەێ کردێ ڤتێ: ڤە ئاواتتە مەڕەسین باوە.
باوەێ سفت گرتە باوش و تەۆڵ ماچ کردە و ڤتێ: تۆ هۆ مەزانین ئاواتم چێە؟!
کوڕە ڤتێ: یە ک م هەر ساق و خوەشاڵ بۆم.
رانندە ک کوڕە جڤونێ بی و تەڤە رەسین ڤە دووسەێ داشتێ و مەگست زەنجیر چەرخەێ واس بکەێ تا شادەت هەر ئەڕا یەێ شەۆییش بیە دی بێ هاوا ڤە رێێکرا نەچوو، پرسیتێ: نامت چێە؟
ڤرەژ یە کەسێ باێە دەنگ کوڕە وژێ ڤتێ: هاوار!
رانندە پرسیتێ: کڵاس چەنین؟
ڤتێ: ساڵێ ترە مەچمە مەدرەسە.
راسی کاکە گووشیەت ئەپڵە یا سامسونگ مودڵ گەڵکسی؟
رانندە خەنی ڤتێ: نووم خوداااا… نە نوکیاێە.
هەر ئەسکە باوەێ ڤتێ: رووڵە رەسینە ماڵ زەنگ بێەرنم.
کوڕەیش ڤتێ: تونیش رەسینە سەر کارەت زەنگ بێەرنم، هاواستیشە کەمەرت بوو.
باوە! دی فرە چێەل قورس هێز نێە، باشەد؟
باوەێ ڤە خەنە کۊن چێەمێ دارن ڤتێ: باشەد رووڵە.
چەن دەێقە دوماتر… باوە هاوار ڤیر کردێە رانندە و ڤتێ: منە ئی دەۆرگردە مامە وار. ماشینە ک وسیاوە کرا ئاولـلەێ داتێ و ڤتێ: راسی! شەۆ چلە گشتتون پیرووز بوو، بنیشینە خوەش.
