هساره
۱
شوون که‌لاوه‌گه‌ێ دڵ بێ ده‌نگ رمانی و چید
پشتم له بار هه‌سره‌ت ئه‌ێ گوڵ!چه‌مانی و چید
ئه‌ێ قه‌سر پڕ له لێموو!که‌م له‌ێ هه‌ناز رێ بوو
له‌ێ هاتوو چینه ئاخر خه‌ێرم په‌ڕانی و چید
داس چاوه‌یل کاود یه‌ێ شەو خسیده شانه و
چــۊزه‌یل باخ گیـانم په‌ل په‌ل رزانی و چید
تا گه‌ر له ئاسماند باڵوو په‌ڕێ وه یه‌ک دام
شەوقم ســـزانم و چێـم باڵم شــکانی و چید
سه‌د خوه‌ر ئه‌گه‌ر هڵاێدن م هه‌ر تیه‌ریکه شەوم
شەوق چراخ ئومرم یه‌ێ شه‌و کوشانی و چید
هێمان نیه‌چوو له هۊرم ئەو سات ک خوه‌رئاوا
زه‌خمه‌یل که‌س مه‌ناسم لێ نوو کولانی و چید
هێمان خێاڵ گیسد ها ناو ده‌سم گلاره !
وه‌ختــێ له بـان شـانه‌و گیسـد کــڕانی و چید
کافر! یه چۊ دڵد هات ئاگر بخه‌یده گیانم؟
جه‌رگم دڵــــم درۊنـم گشتــێ ســزانی و چید
ئێ هۊره تا قێامه‌ت هه‌ر ها وه‌ر چاوه‌یلم :
لەو شەو بێ هســاره ئه‌سـرێ رشـانی و چید
۲
ئه‌ێ شـه‌و خه م ! چه‌مانی پشـت هساره گانم
ئه‌ێ تیـخ ژان ! کـولانی زه‌خمه‌یل بێ زووانم
له‌ێ هاتووچین ئومره تاگه‌ر چاوێ له یه‌ک دام
سانێ نەمەن له مشتم بارێگ نەمەن له شانم
م دڵ خوه‌شی وه چاو نه‌یم له‌ێ سه‌رده‌واێ ژیانه
ســــزیـاێه بـاخ گیـــانــم ، رمــیـاێــه میـلکـــانم
رووژ و شەوم له دۊرید چه‌ن ساڵه دی تیه‌ریکن
کــەێ بوو شـەوێ هـڵایدن ئه‌ێ مانگ ئاسمانم ؟!
بەو تا دوجـاره گـوڵ به‌ێ داره پـۊتاره‌گه‌ێ دڵ
بــەو تا ده‌وا بـکه‌یدن ده‌رده‌یل کـــه‌س مـه‌زانم
م شـــوون پاێ پـەژاره‌م له ئاسمــــان هـۊرد
ت رووشنــاێ هســاره‌ی له بـێ که‌سی شەوانم
ئه‌ێ ئاوره‌گه‌ێ وهاره‌م! لەو رووژه گ ت چیده
دی پەل نیه‌ێ ئه‌نارێ له وشــکه زار گیانم
نه واێ زه‌لان نه زمسان ئه‌ێ شەوبوه‌یله رچگان
په‌ل په‌ل رزانـه‌م ئاخـــر داســه‌یل باخـه‌وانم
تا کەێ به‌شم له ئه‌زره‌ت هه‌ر بووده زۊخوو هه‌سره‌ت
تا کــەێ ت له‌ێره بـۊدوو م شوون ت نه‌زانم
هـــه‌م ئاگــر خێیــاڵــد گــۆڕ گـــرتـیـیه وه سیـنه ؛
م وه‌ڵنــگ ئـه‌زره‌ته‌یلم لــه‌ێ ئاگــــره سزانم
نــاو داڵـگم پــه‌ژاره‌س باوگــم مناڵ داخــه ؛
خوه‌م شێت که‌س مه‌ناسێ له سه‌رزه‌مین ژانم
شێـــوه‌ێ ژیــانم ئه‌ێ دڵ مینێده دار کاجێ
سه‌رسەوزم و نیه‌زانن سه‌ر تا وه پا خه‌زانم
دی ئەو وهار سەوزه گشتێ له هۊرمەو چێ
یه‌ێ ئومره بێ ت نازار! مێوان واێ زه‌لانم
ئوقه‌ر له ناو خاوه‌یلم داو نامه شوون خێیاڵد
ئازای نه‌مه‌نێه ئمشــه‌و له به‌ن به‌ن سقـانم
واران ! ده‌خیلدم بەو باڵـێ له ئێره داخه !
نه‌یل تا هه‌ناس زمســان ئاگر بخه‌ێده گیانم
