هساره
یــــاران دڵــسوز ، دۊیــه‌تـــــه‌یل دڵپاک
شێــران نــــه‌مـــر ، كــوڕه‌ێـــــل چـالاک
كــــام یــــه‌ك لــه ئیوه ،وه‌هـاران جـارێ
ئـــرمێس واران، لــه چــــه‌و نیــــــه‌وارێ
ئڕاێ ئـــه‌و شــــاره ، چـروه‌گــه‌ێ هێماێ
چـه‌نی چه‌‌‌ن ساڵـه دۊنم، قــرچ هــــه‌ڵاێ
شارێــــگ ک شـــادی ، هـامێتـه‌ێ خـه‌مه
هـــه‌ر كـــوو لــێ دۊنی، شــوون سته‌مـه
شارێـــگ ک هـــه‌ورێ ، گـــاز خــه‌رده‌ڵۊ
ئاگـــر نـــــه‌وروزێ ، تــه‌پ و دۊكــــه‌‌ڵـۊ
شارێــگ نـــه‌رمــه‌واێ ، مێنست وه‌بـــه‌ڵا
دیــادن لــه هه‌ر كه‌س، رزیــاد چــۊ گه‌ڵا
شارێگ گشت چۊ مه‌ل، له‌رزیان و كـه‌فتن
گـــه‌وره‌و بۊ چگێیان، له بان خـاک خه‌فتن
خــه‌وێگ ک هـه‌رگز، كه‌س لێ هێز نه‌گرد
پــا دار و بـێ پا گشت چۊ یه‌ک لـێ مرد
ئـــه‌وه‌ێ هـــه‌وڵ گیان چنگ كوتا له زه‌ۊ
خـــودا ئــــه‌ێ هــاوار ئاخر گوناێ چه‌ۊ ؟
كام شار دین وه‌ی جوور، دالێ قه‌ڵپه‌نجه
بـــاڵ ڕه‌ش مــــه‌رگ ، بێجگه هــه‌ڵـه‌بجه
مه‌گـــه‌ر كه‌سێ مه‌‌ن، خاک بكه‌ێ لاشه‌ێ
تا ئــــڕاێ زوهـــاک ، بـوو وه هه‌ڕه‌شه‌ێ
شارێـــگ ک زاڵــم، وه یه‌ێ روژ لێ سه‌ن
په‌نــج هه‌زار شه‌هێد، چۊ نه‌كه‌ێده‌ی په‌ن
باینــه‌و سه یاران ، هـه‌ر ساڵ ئی وه‌خته
ک روژ قــــڕان ، كــورد بــه‌دبـــه‌خــته
وه یـــاد پــه‌پووله‌یل ، باڵ سزیاێ ده‌مێ
روشن كـــه‌یم هـــه‌ر كــام له ئیمه شه‌مێ
تا گـــه‌ر جـــارێ تر ، شـــه‌مشه‌مه كوره
فكـــر نـــه‌‌كـــه‌ێ تا سه‌ر دنیا وه‌ێ جوره
ئــــاخ ئـــه‌ر من خـــه‌مبار، سیه هــاوه‌رم
داخ دارێ ڕوڵــــه‌ێ ، عـــــومـــر خـاوه‌رم
تا روژێــــگ ئـــرمێس پـه‌رده‌ێ هه‌جاوه
روحم چـوو گل خـوه‌ێ بێده‌‌نگ له‌و ناوه
