هساره
زه‌نگ خوارد و له کڵاس دامه‌و ده‌یشت. ره‌فیقه‌گانم له لاێ یه‌ک وساؤن. چیم ئڕا لاێان داشتن گه‌پ نه‌وروز دیان و خه‌نسیان.
وه‌تم: چوە‌دانه چمان فه‌ره سه‌رخوه‌شین.
یه‌کێ له لێان وه‌ت: ئاخر توایم دؤاێ مه‌دره‌سه وه‌ل ماڵه‌و بچیمه بازار دڵنگ نوو بسینیم راسی ت چه؟ نه‌سه‌نیده؟ قردگێ چێمه مقه‌و ئێکه‌ش وه‌تم: هه‌گ باوگم باێدو چم سێنم وه‌تێه ئمساڵ چێشته‌یل خاس خاسێ ئڕاد سنم تازه ئه‌گه‌ر نمره‌گاندیش خاس بوون کامپیوتریش ئڕاد سنم.
وه‌تن: خوه‌ش وه هاڵد ت ک نمره‌گاند هه‌میشه خاسن. ئمجا باوگد که‌ێ تیه‌ێده‌و؟
وه‌تم: نیزانم!!! وڵام وه‌تێه وه‌رجه عه‌ێد تیه‌مه‌و.
زه‌نگ کڵاس خوارد چیمنه کڵاس ئمجا هه‌ر نیزانم له کڵاس چه وه‌تیا و چه نؤسیا م هه له فکر یه بؤم که‌ێ زه‌نگ ئاخر بخوهێ بڕەسمە ماڵ. زه‌نگ خواردو وه هه‌ڵه‌په‌ڵه کتاوه‌گانم جه‌مه‌و کردم و دامه‌و ده‌یشت. له مه‌درسه تا ماڵ وه ده‌و چیم. وه قایم وه گورمێچە دام له ده‌ره‌گه ڕم ڕم ….. خوه‌یشکم زؤزی هات ده‌ره‌گه واکرد.
_چوه‌ده نانه‌سه سه‌رده‌و ده‌رگه شکانید؟
_هؤچ نێیه داڵگم هاماڵ؟
_ئا ئه‌نؤ تواێ له کو وبوودن؟.
که‌وشه‌گانم که‌نیم ده‌ر هاڵه‌گه وا کردم و چێمه‌و ناو داڵگم داشت شام درس کرد.
چڕیم: دا داڵگه؟
_ها ڕوڵه.
_باوگم زه‌نگ نێاێه؟
_نه ئڕا ؟
_هؤرێ که‌م توام بزانم که‌ێ تیه‌ێده‌و؟!
_نیزانم، قه‌ێرێگه زه‌نگ نێاێه خوه‌د زه‌نگێ بێیه پێ.
گورجانه هه‌ڵسام و ژماره‌گه‌ێ باوگم گرتم. له هاماج نه‌ؤ چه‌ن جار گرتم تا ئاخرێ بوق خوارد.
_ئه‌له‌و ئه‌له‌و باوگه.
_سڵام خاسی ڕوڵه؟
_ئا خاسم.
_ خوه‌ێشکه‌گه‌د خاسه دالگ.
دامه ناو قسیه‌ێه‌و وه‌تم: ئا گشتێان خاسن باوگه که‌ێ تیه‌یده‌و؟
_ تیه‌مه‌و ئرا چه بؤیە؟
_ ڕه‌فیقه‌یلم توان ئڕا نه‌وروز دڵنگ نوو بسنن!
_ خوو مبارکێان بود، تنیش سنید.
_ ئا زانم هه‌گ بایده‌و ئڕام سنید، ئمجا ئؤشم دی ئه‌ێد نزیکه هه‌ر ۲۰ روژ مه‌نێه، دی چه‌ن روژ تره‌ک هایده ماڵ؟
_ تا بزانم که‌ێ پؤل ده‌نه پیم وه‌ێ زؤه تیه‌مه‌و ئێرنگه گوشیه‌گه ده‌یده داڵگد؟
_داڵگه باوگم تواێده‌د.
_ئه‌ڵه‌و.
_ئه‌ڵه‌و خاسی ده‌نگوباس؟
_سڵامه‌ت بای خاسم خود خاسی؟
_ نیه‌و ئه‌ێ مناڵه بوردیای داک دڵنگێ ئڕاێ بسه‌نای؟
_ وه کام پؤل؟ زانی یه چه‌نێگه پؤل کل نه‌کردیده نانه‌گه‌یش دی وه قه‌رت تیه‌رم.
له پشت تلیفونه‌گه وشکمه‌و برد. هه نیزانم که‌ێ قه‌ت بؤدن.
نیزانم چه‌نێگ بؤ له سؤک وتاخه‌گه کز کردؤم ته‌نانه‌ت له‌به‌س هاڵم خراو بؤ شامیش نه‌خواردم. دامه‌و ده‌یشت ئاوێ دامه ده‌مچه‌وا هاتمه‌و.
_ هووشه‌نگ ره‌فیقم وه‌ت: چوه‌ده په‌شێوی.
وه‌تم: خاس نیم سودسوو ئه‌ێده و قوروش پؤل نه‌ێرم ئێ بێ خودایلیشه هه ئمڕوو سوو وه پیم که‌ن نه گیان کار کردن دێرم نه هه‌وسڵه‌ێ وسان ، مه‌نمه چوه بکه‌م خودا خه‌ریکم کردێیه.
_ کوره پاپه‌ێ نه‌و به‌و بنیشه ئێره، توای به‌سێگ ئراد بێیه‌مه قه‌ێه‌و هاڵد خوه‌ش بکه‌ێ؟
_ هه‌ر یه‌مه مه‌نێیه.
شه‌و تا شه‌وه‌کی خه‌و وه باڵ چه‌وم نات. دنیا لیم بؤده سوو گونوژێ خشتم جی نیه‌گرتیاد له زه‌ؤ و ئاسمان ئاساشم نه‌گرت قسیه‌ێ کوڕه و ژنه‌م داشت ئاگرم دیاد.
شه‌وه‌کی وه سه‌ر کار نه‌چیم دی له جیڕه‌ێ پێچ و ته‌قه‌ێ ئاسن و میلگرد ئاس بؤمه و له ژیانیش شه‌که‌ت. گاجارێ حه‌ق دیامه هووشه‌نگ وه‌تیاد هه‌گ دؤاێ ئێ هه‌مگه‌ێ سال ده‌رس خوه‌نینه یه‌کد وه دو نه‌ود و دؤاێ ئه‌وه‌یش بای ئڕا کارگه‌ری وه جیه‌یلێ ک ناوێان نه‌ژنه‌فتؤد، دنیا بوده هؤچ و ژیان پؤچ، ئمجا داخمه ئڕا مردن. له جیگه‌خه‌و شرکه‌ت دامه‌و ده‌یشت و چیم وه‌ره‌و لاێ به‌رپرس شرکه‌ت. دام له ده‌ر و چێمه‌و ناو داشت وه‌ل تلیفونه‌و قسیه کرد سڵام کردم و نیشتم داشت گه‌پ پؤل نێاشتن و پؤل سه‌نن دا، چمان ئاو سه‌ردێ کردیده ملمه‌و زانسم هؤچ گیرم نیه‌تیه‌ێ. قسیه‌گانێ ک تمام بؤ وه یه‌واش چه‌نگله لاپه‌ڕه له ناو کشاوه‌گه دراورد و ناره‌ێ ناو کیفه‌گه‌ێ هه له‌و کاته وه‌ت: ئڕا چه هاتیده.
وه‌تم: قوربان ده‌م ئه‌ێده‌و پؤل نه‌ێرم توامیش بچمه‌و. وه ژێر ده‌مه‌و بسکه خه‌نێگ کرد.
وه‌ت: ئه‌ێد؟!!! ئرا کارگه‌ریش سه‌رێ له ئه‌ێد و تاتیلی بوود؟؟ بچو دو روژ کار بکه …
چه‌قو بێاتانه لیم خؤن له لیم نات له شوونم هێز گرتم و وه‌لێا بؤیه ده‌م‌قاڵم.
وه پێ وه‌تم: ئڕا هه‌ر ت زانی ئه‌ێد که‌ێه، هه‌ر له‌ێره وسید و پؤل کوو که‌ی، لانکه‌م من شه‌و ئه‌ێد هامه لاێ ژن و مناڵم. تو چه هه‌ر ئه‌ێره شونده. پیاێ له خوه‌ێه‌و بؤ و بێده‌نگ مه‌ن. گڕێ نوڕسیمنه یه‌کەو. هه‌ر دوکمان سه‌رده‌و بؤمن و نیشتیم� ماڵ و وه‌تم که‌فتمه‌سه رێیا ده‌نگ خوەشڵه‌خوەشی مناڵه‌گانم هؤرو فامم وه‌لا بردێه و شه‌که‌تی کار و خه‌م دؤری مال له لیم سه‌نێه.
***
هناێ ئه‌ژنه‌فتم باوگم تێده‌و کان کردم هه‌ر له ناو ماڵه‌گه ژاو ئڵاوردم داڵگم تنیا پیما و که‌فته لیم ئڕاێ مه‌دره‌سه. له ناو رێ ته‌قیامه هه‌ر ره‌فیقێگه‌و وه‌تم باوگم سوو تیده‌و و دی چم دڵنگ نوو سنم.
***
وه سه‌ر ئێ رێ دؤر و دریژه ک فەره‌یش شه‌که‌تم کردؤد له ناو ئتبووس خه‌ومه‌و نه‌ورد. مانگ ئاخر زمسان بؤ. جاده‌گه یه‌خ به‌ساؤد و له وه‌یشت ته‌م دیار نه‌ؤ. ده‌م‌چه‌و رانه‌نده‌گه له ناو جامه‌که‌گه دا وه‌ر چه‌وما ده‌مه کاوه‌کی گرتؤده‌ێ. چرچ چێ له گیانم. جاده له‌لیم دیار نه‌ؤ. کاتژمێرێ فره‌تر وه ماڵ نه‌مه‌نؤد. که‌فتمه هؤر خه‌نسن مناڵه‌گانم، فەره خوه‌شی ئرا ئه‌ێد کردن. ماشینەگه ته‌کانێ برده‌ێ…. رانه‌نده‌گه هه‌ڵپه‌ڕی…. سفت فه‌رمانه‌گه گرت. وەڵام ئتبووس وه‌ره جی تر چێ…. دی هؤچ له هؤرم نیه‌تیه‌ێ، بێجگه قیژەێ ئامپووڵانس.
