ماڵپەڕی هسارە / دەنگوباس / رێورەسمی کردنەوە و دەسبەکاربوونی بنکەی فەرهەنگی ئەدەبیی وارین‌ لە کرماشاندا

رێورەسمی کردنەوە و دەسبەکاربوونی بنکەی فەرهەنگی ئەدەبیی وارین‌ لە کرماشاندا

به‌پێی راپورتی لێژنەی راگەیێنەریی بنکەی فەرهەنگی ئەدەبی وارین‌ی کرماشان، ئەم بنکەیە هاوکات لەگەڵ رێوڕەسمی بەفەرمیی کردنەوەی، لە رۆژی ۲۱ی خەزەڵوەری ۱۳۹۷دا ئێوارە شیعرێکی کوردی لە هۆڵی تایبەتی پیشانگای کتێبی پارکی شاهیدی کرماشان بەڕێوەبرد.

 ئەم بنکە؛ یەکەمین و تاقە بنکەی مۆڵەتپێدراوی ناوندی پارێزگای کرماشانە کە چالاکیەکانی خۆی بە مەبەستی گەشەپێدان و پێشخستنی زمان و وێژەی کوردی لەم شارەدا دەسپێدەکات.

لە رێورەسمەکەدا بەڕێوەبەری گشتیی ئیدارەی فەرهەنگ و ئیرشادی ئیسلامیی پارێزگای کرماشان رێزدار دوکتور رەحیم جەعفەری وێرای پێشکەشکردنی وتارەکەی بە زمانی کوردی، دوو خاڵی گرنگی خستە بەر باس:

یەکم: جەختی لەسەر ئەوە کردەوە کە ئەو روانگە و بۆچوونانە کە دەیانەوێت زمانی کوردی وەک زمانێکی شڕ و لەباوکەوتوو لە قەڵەم بدەن، نازانستین و چ بەهایەکی لۆژیکیان نیە.

دووهەم: داوای لە نووسەران و چالاکوانانی بواری فەرهەنگ و ئەدەبی کوردی کرد کە لە روانگە توند و زێدەخوازەکان کە پروپاگەندە بۆ هەڵوێستێکی تایبەت دەکەن ئەکید خۆ بپارێزن.

بەڕێز جەعفەری جەختی لەسەر ئەمەش کردەوە که بە ئامانجی گەشەسەندنی فەرهەنگ و ئەدەبی کرماشان دەبێت بەتەواوی پەرە بە بابەتە کولتووری و ئەدەبیەکانی بدەین و خۆمان لە باسە بێ‌نرخەکان و پەراوێزەکان لابدەین.

وتاربێژی دیکەی کۆڕەکە بەڕێز خانمی دوکتور پەریسا محەمەدی جێگری فەرهەنگیی ئیداره‌ی ئیرشادی پارێزگای کرماشان بوو کە وێڕای ئاماژە دان بە پشتگیری کردنی ئیدارەی گشتیی ئیرشادی پارێزگا لە زمان و فەرهەنگ و وێژەی کوردی، باسی ئەوەی کرد کە جێی بنکەیەکی کوردیی بەهێز و بەئوسلووب لەم شارەدا خاڵی بوو کە بنکەی وارین ئەو بۆشاییەی پڕ کردەوە و ئەم رووداوە هەوێنی خۆشحاڵی و بەختەوەریە.

 دکتورمحەمەدی لە درێژەی قسەکانیدا وتی پێویستە لەم بوارەدا کار و تێکۆشانێکی زێدەتر بکرێت.

بنکەی فەرهەنگی ئەدەبی وارین و ئەدەبیاتی کوردی کرماشان

هەروەها بەڕێز دکتور محەمەد ئاشنا عەباس مەنش که پێشکەشکاری کۆڕەکە بوو لەسەر پێویستیی فێرکاری رێنووسی ئیستانداردی کوردی کە لە لایەن زانستگاکان و ناوەندە زانستیەکان داڕێژراوە و پەسەند کراوە چەن روونکردنەوەی گرنگی ئاراستەی ئامادەبوان کرد.  دوکتور ئاشنا هەروەها هەواڵی بەڕێوەچوونی خولی وانەی رێنووسی کوردی و خولی شیعر و چیرۆکنووسیی کوردی لە لایەن بنکەی وارینەوە راگەیاند.

 کۆڕەکە بەرەوڕووی پێشوازیی گەرمی شاعیران و نووسەران لە هەموو زاراوە و دیالکتەکانی زمانی کوردی ببوەوە کە بوو بە هۆکاری درووستبوونی کەشێکی دۆستانە و پڕ لە هاودڵی.

خاڵێکی گرنگی ئەو کۆڕە، ئامادەبوونی ژمارەیەکی بەرچاو لە ژنانی شاعیر و نووسەر لە رێورەسمەکەدا بوو؛ بەڕێزان:

ئیران عەلیکەرەمی، مەهوەش سڵێمانپوور، سمەیه سەفەری،مهری ئەکبەری،سارا مورادی،خدیجه پەناهی و مەهناز مورادی بە پێشکەشکردنی شیعرەکانیان بەها و رێزێکی تایبەتیان بەخشیە کۆڕەکە.

موحسن مەلەکی بەڕێوەبەری باڵای بنکەی وارین لە رێگەی وتارێکەوە پێویستبوونی دامەزراندن و چوارچێوەی چالاکیەکان و هەروەها مەبەست و ئامانجەکانی بنکەکەی بە ئامادەبوان ناساند.

ئەمین شیرزادی، ئارەش ئەفزەلی، فواد موزەفەری، قاسم ئەرژەنگ، پەیمان جەسەری، عەلی سەهامی، نادرزەنگیشه‌یی، فەرزاد سەفەره، موجتەبا کارخاهی، پژمان ئاقایی، سەعید ئەمینی، رەزاجه‌مشیدی، عەلی نەزەری، سەجاد عەزیزی، مەهدی شەریفی، عادل ئەعزەمی، جەمیل مورادی، رەحمان محەمەدی و ئاوا ماهیدەشتی ئەو شاعیرانە بوون که جارێکی تر بە شیعرە جوانەکانیان کۆڕەکەیان رازاندەوە.

 ئامادە بوونی شاعیران و لێکۆڵەڕانێکی ناودار وەکوو ئارەش ئەفزەلی، قاسم ئەرژه‌نگ، ئاکو جەلیلیان، رەزا مەوزوونی ، عەلی سەهامی  و جەلیل ئاهەنگەرنژاد  یەکێک تر لە خاڵە گرنگەکان و جێسەرنجەکانی ئەم کۆڕە بوو.

پێشکەشکردنی شیعر لە لایەن چەن کچێکی مێرمندال بە نێوی په‌ریسا نەجەفی، سەناقادری و لاوین جەمشیدی گەرموگوڕیەکی تایبەتی بەخشیە کۆبوونەوەکە.

جێی خۆشحاڵیە کە پێشوازی لە کۆڕەکە تا رادەیەک بوو کە تا کۆتایی رێوڕەسمەکە هۆڵەکە پڕ بوو لە هۆگران و ئەویندارانی زمان و ئەدەبی کوردی.

ئەندامانی بنکەی فەرهەنگی ، ئەدەبی وارین‌ی کرماشان بریتین له:

دکتورمحه‌مەد ئاشنا عەباس مەنش ، موحسن مەلەکی، مەهوەش سڵێمانپوور، جەمیل مورادی، فرزاد سەفەره، سەمیرا زەمانی مونفەرد، فواد موزەفەری، ئەردەدشێرمووسەڤی .

ئامادەکردنی راپورت: ئەردەشێر مووسەڤی سەرۆکی لێژنەەی راگەیاندنی بنکەی وارین‌ی کرماشان.

بنکەی فەرهەنگی ئەدەبی وارین‌ی کرماشان

چاوێک بخشێنە بۆ ....

پایز شەقام شارداری ئسڵام ئاوا لە دەروەچ دووربین یووسف شەفیعی

بۆچوون بنووسە

ئیمەیلەکەتان نیشان نادرێت.خانە داواکراوەکان نیشانە کراون. * بخش‌های موردنیاز علامت‌گذاری شده‌اند *