هساره
بێ هات و چوو
وێنەێ کووشک چووڵ داڕمیاێگ
پەشێویامەسە کوڵەسۊکێگ
قسەتاڵەگەێ دروونەێەر شارێگم
ک مەردمانێ ئەڕا دروو یەک چەپ تەقنن و درووسێنِ یەکن.
هەرجار دۊنمەێان چماێ هاتمەسە پرسەێ پرسیار و
زەماوەن نەزانی
کام دێزەیی لە قەور کام نەڕەگەور سیه هەڵسا
کام ئسفەن دۊ نەکریا و
پا نریا بان کام پشمەێ شەڕ؟
ک بڵێزەێ شەوکوش کوشریاوە؟
های…های…های ڕه‌فیق بێ‌شوون
ڕەفیق بێ شین،
ئی خێڵ واقەو بردێه
ئی خێڵ دەم-تەنیا-وه-کاوێژ-واکەرە
چۊ تووراننەد؟
ئی‌هەمگە زەردەخەنەیل پەڕوویینە
کام شێوەێ شەڕ دۊرانە قەێ دەمچەوێان؟
تا وە دەس‌مشتاق بانە پیریدەو و
لە‌توو شاڵەگانێان
خەنجەر بشارنەو
کام قارچگ زەرد پاێ کام دارِ ئاویاری‌کریا وە خۊن‌وچڵک
هڵوفانن و لێوە بین؟
شانازی ئاوس بین و زایین کەن
شانازی سفرەێ ڕەنگین‌تر لە هاوسا
شانازی دروویاری.
های…های…های…
ڕاس و پاک یارەگەێ بێ لف،
خوسەخوەر گەڵاێ تەرچک مەێو و کوورپەیل بێ‌دەسەڵات،
جامک‌گرِ نوواێ چەپەڵی گشت
چیدنە کام وڵات بێ‌شەو؟
چیدنە کام دیار بێ‌دروو؟
وێنەێ کووشک چووڵ داڕمیاێگم
بێ هات و چوو
